ဘန်ကောက်၊ ဇူလိုင်-၂၄-၂၀၂၅
မျိုးဆက်(VOM)
ထိုင်းနဲ့ ကမ္ဘောဒီးယားတပ်ဖွဲ့ဝင်တွေအကြား ယခုမနက်အစောပိုင်းက နယ်စပ်မှာ ပစ်ခတ်မှုတွေ ဖြစ်ပွားပြီးနောက် ထိုင်းနိုင်ငံရဲ့ F-16 တိုက်လေယာဉ်တွေက ကမ္ဘောဒီးယားနယ်စပ်ရှိ စစ်ရေးပစ်မှတ်တွေကို ဗုံးကြဲတိုက်ခိုက်မှု ပြုလုပ်ခဲ့ကြောင်း နှစ်နိုင်ငံစလုံးက အတည်ပြုပြောဆိုလိုက်ပါတယ်။
နယ်စပ်မှာ ရက်သတ္တပတ်အတော်ကြာ တင်းမာနေတဲ့ အခြေအနေတွေကနေ အခုလို ပဋိပက္ခတွေ ဆက်လက် ဖြစ်လာခဲ့တာပါ။ ဒီကနေ့ ပစ်ခတ်မှုတွေအတွင်း အနည်းဆုံး အရပ်သား နှစ် ယောက် သေဆုံးသွားပြီလို့ သိရပါတယ်။
ထိုင်းစစ်တပ်ရဲ့ ပြောရေးဆိုခွင့်ရှိသူက သူတို့ရဲ့ F-16 တိုက်လေယာဉ် ခြောက်စင်းထဲက တစင်းဟာ ကမ္ဘောဒီးယားဘက်ကို ပစ်ခတ်ပြီး စစ်ရေးပစ်မှတ်တစ်ခုကို ဖျက်ဆီးလိုက်တယ်လို့ ပြောပါတယ်။ ဒီပဋိပက္ခကို ဘယ်ဘက်က စတင်ခဲ့တာလဲဆိုတာနဲ့ ပတ်သက်ပြီး နှစ်နိုင်ငံစလုံးက အပြန်အလှန် အပြစ်တင်နေကြပါတယ်။
ထိုင်းစစ်တပ်ရဲ့ ဒုတိယပြောရေးဆိုခွင့်ရှိသူ Richa Suksuwanon ကတော့ စီမံချက်အတိုင်း စစ်ရေးပစ်မှတ်တွေကို လေကြောင်းတိုက်ခိုက်မှု ပြုလုပ်ခဲ့တယ် လို့ သတင်းထောက်တွေကို ပြောပါတယ်။ ထိုင်းဘက်က သူတို့ရဲ့နယ်စပ်ကိုလည်း ပိတ်လိုက်ပါတယ်။
ကမ္ဘောဒီးယားကာကွယ်ရေးဝန်ကြီးဌာနကတော့ ထိုင်းတိုက်လေယာဉ်တွေက လမ်းပေါ်ကို ဗုံး နှစ် လုံး ချခဲ့တယ်လို့ ဆိုပါတယ်။ ကမ္ဘောဒီးယားရဲ့ အချုပ်အခြာအာဏာနဲ့ နယ်မြေတည်ငြိမ်မှုကို ထိပါးတဲ့ ထိုင်းနိုင်ငံရဲ့ လက်နက်ကိုင် တိုက်ခိုက်မှုကို အပြင်းအထန် ရှုတ်ချကြောင်း ပြောပါတယ်။
ဒီပဋိပက္ခမဖြစ်ခင်က အကြောင်းကတော့ အငြင်းပွားဖွယ်နယ်စပ်မှာ မကြာသေးခင်က ချထားတဲ့ မြေမြှုပ်မိုင်းကြောင့် ထိုင်းစစ်သား တယောက် ခြေတစ်ဖက် ဆုံးရှုံးခဲ့ရပြီးနောက် ထိုင်းဘက်က သူတို့ရဲ့သံအမတ်ကြီးကို ပြန်ခေါ်လိုက်ပြီး ကမ္ဘောဒီးယားသံအမတ်ကိုလည်း နှင်ထုတ်မယ်လို့ ကြေညာခဲ့ပါတယ်။
ဒီပဋိပက္ခတွေကြောင့် နယ်စပ်နားက ထိုင်းနိုင်ငံသားတွေဟာ ယာယိခိုလှုံရာနဲ့ ဘေးလွတ်ရာကို ရွှေ့ပြောင်းမှုတွေ ပြုလုပ်နေပါတယ်။ ထိုင်းနဲ့ ကမ္ဘောဒီးယားနိုင်ငံတို့ဟာ မိုင်ပေါင်း ၈၁၇ မိုင်ရှည်လျားတဲ့ နယ်စပ်မျဉ်းမှာ နှစ်ပေါင်း အငြင်းပွားမှုတွေရှိနေခဲ့ကြပါတယ်။ ၂၀၁၁ ခုနှစ်က တပတ်ကြာ စစ်ရေးပဋိပက္ခတွေ ဖြစ်ခဲ့ဖူးပါတယ်။
ယခုနှစ် မေလတုန်းက ကမ္ဘောဒီးယားစစ်သား တယောက် သေဆုံးသွားတဲ့ နယ်စပ်ပဋိပက္ခကနေ နိုင်ငံတကာဆက်ဆံရေး အကြပ်အတည်း ဖြစ်လာခဲ့ပြီး အခုအခါမှာတော့ လက်နက်ကိုင် ပဋိပက္ခတွေ အထိ ဦးတည်နေတာဖြစ်ပါတယ်။
Ref:Refuters
Photo:Royal Thai Army
